Arquivo da Imaxe do Porriño: O IV Concurso Fotográfico "As Festas do Crsito 2010" xa ten gañadores!

4/11/10

O IV Concurso Fotográfico "As Festas do Crsito 2010" xa ten gañadores!

De esqda. á dta.: María Teresa Herrero Nacimiento (2º premio), José Daniel Bermejo Lázare (1º premio), o Alcalde do Porriño Nelson Santos, Miguel ángel Herrero Delicado (3º premio), e o tenente Alcalde Manuel Carrera, durante o acto de inauguración da exposición.

O pasado mércores 3 de novembro tivo lugar o acto de inauguración da mostra cos traballos presentados á IV edición do Concurso Fotográfico "As Festas do Cristo 2010", organizado polas concellerías de Cultura e de Xuventude do Concello do Porriño a través do Arquivo Municipal da Imaxe e da Oficine Municipal de Información Xuvenil. O acto contou coa presencia do Alcalde do Porriño Nelson Santos, o tenente alcalde Manule Carrera, varios representantes da Comisión de Festas do Cristo 2010, e concursantes que participaron no certame. Neste acto desveláronse cales foron as tres fotografías gañadoras, decisión tomada previamente por un xurado composto por cinco profesionais da fotografía e do deseño creativo. O xurado coincidiu en resaltar a calidade dos corenta e sete traballos presentados, o que sen dúbida dificultou a elección. Finalmente outorgouse o primeiro premio, dotado con trescentos euros, a José Daniel Bermejo Lázare coa fotografía titulada "Peligra el Artista"; o segundo premio, de douscentos euros, foi para María Teresa Herrero Nacimiento con "Formación"; e o terceiro premio, de cen euros, foi para "Capilla Iluminada" de Miguel Ángel Herrero Delicado. A exposición cos traballos presentados a concurso pódese visitar no Centro Cultural Municipal durante todo o mes de novembro. Proximamente habilitarase tamén unha galería virtual coas fotografías na páxina web www.concellodoporrino.net. O Concello do Porriño quere transmitir o seu agradecemento a todas as persoas que participaron no certame, así como aos membros do xurado pola súa inestimable colaboración.