Arquivo da Imaxe do Porriño

O IV Concurso Fotográfico "As Festas do Crsito 2010" xa ten gañadores!

2010-11-04T11:56:00.002+01:00

De esqda. á dta.: María Teresa Herrero Nacimiento (2º premio), José Daniel Bermejo Lázare (1º premio), o Alcalde do Porriño Nelson Santos, Miguel ángel Herrero Delicado (3º premio), e o tenente Alcalde Manuel Carrera, durante o acto de inauguración da exposición.

O pasado mércores 3 de novembro tivo lugar o acto de inauguración da mostra cos traballos presentados á IV edición do Concurso Fotográfico "As Festas do Cristo 2010", organizado polas concellerías de Cultura e de Xuventude do Concello do Porriño a través do Arquivo Municipal da Imaxe e da Oficine Municipal de Información Xuvenil. O acto contou coa presencia do Alcalde do Porriño Nelson Santos, o tenente alcalde Manule Carrera, varios representantes da Comisión de Festas do Cristo 2010, e concursantes que participaron no certame. Neste acto desveláronse cales foron as tres fotografías gañadoras, decisión tomada previamente por un xurado composto por cinco profesionais da fotografía e do deseño creativo. O xurado coincidiu en resaltar a calidade dos corenta e sete traballos presentados, o que sen dúbida dificultou a elección. Finalmente outorgouse o primeiro premio, dotado con trescentos euros, a José Daniel Bermejo Lázare coa fotografía titulada "Peligra el Artista"; o segundo premio, de douscentos euros, foi para María Teresa Herrero Nacimiento con "Formación"; e o terceiro premio, de cen euros, foi para "Capilla Iluminada" de Miguel Ángel Herrero Delicado. A exposición cos traballos presentados a concurso pódese visitar no Centro Cultural Municipal durante todo o mes de novembro. Proximamente habilitarase tamén unha galería virtual coas fotografías na páxina web www.concellodoporrino.net. O Concello do Porriño quere transmitir o seu agradecemento a todas as persoas que participaron no certame, así como aos membros do xurado pola súa inestimable colaboración.

PRIMEIRO PREMIO: "Peligra el Artista" de José Daniel Bermejo Lázare

SEGUNDO PREMIO: "Formación" de María Teresa Herrero Nacimiento

TERCEIRO PREMIO: "Capilla Iluminada" de Miguel Ángel Herrero Delicado

O Concello do Porriño convoca o IV Concurso Fotográfico "As Festas do Cristo 2010"

2010-09-02T10:36:00.005+02:00

As Concellerías de Cultura e de Xuventude do Concello do Porriño, a través do Arquivo Municipal da Imaxe e da Oficina de Información Xuvenil (O.M.I.X.), veñen de convocar o IV Concurso Fotográfico "As Festas do Cristo 2010".

As persoas que participen deberán plasmar a súa visión sobre o acontecemento festivo máis importante da vila do Louro. Este ano haberá un primeiro premio dotado con 300 €, un segundo de 200 €, e un terceiro de 100€. Cada participante poderá presentar un máximo de cinco traballos en papel fotográfico e nun tamaño entre 18-20 x 24-25 cm. antes do 15 de outubro de 2010. Un xurado formado por varias persoas do ámbito da Fotografía e das Artes Plásticas será quen decida cales son as mellores imaxes. con este concurso a organización quere poñer en valor os aspectos etnográficos, culturais e sociais relacionados coas festas locais a través da linguaxe fotográfica.

Se queredes ver as fotografías presentadas a concurso na pasada edición clicade aquí:

http://www.arquivodaimaxedoporrino.net/concurso_cristo/fs_aux.html

BASES:

Dentro das actividades que se inclúen na programación das Festas do Cristo do Porriño 2010 as Concellerías de Cultura e de Xuventude do Concello do Porriño, a través do Arquivo Municipal da Imaxe e da Oficina de Información Xuvenil (O.M.I.X.), convocan a 4ª edición do concurso fotográfico “As festas do Cristo”:

1 TEMÁTICA:

As fotografías versarán sobre calquera aspecto relacionado coas Festas do Cristo 2010 e como son vividas polas porriñesas e os porriñeses.

2 PARTICIPANTES:

Poderán participar todas as persoas que o desexen, sen diferenciación de idades.

3 FOTOGRAFÍAS:

Cada participante poderá presentar ata un máximo de cinco fotografías. As obras deberán ser orixinais, inéditas e non ter sido premiadas nin recoñecidas ou seleccionadas noutros certames.

As fotografías presentaranse en papel fotográfico, cun tamaño de 18-20 X 24-25 cm, e pegadas sobre unha cartolina negra que teña como referencia o tamaño DIN A-4. Presentarase tamén unha versión en formato dixital (Tiff o Jpeg), a 300 ppp como mínimo e resolución mínima de 800x600 píxel.

4 FORMA DE PRESENTACIÓN:

Cada fotografía levará escrito no seu dorso:

Pseudónimo, que deberá ser común para todas as obras da mesma autoría.

Título, de cada unha das fotografías.

Acompañará a cada unha das fotografías presentadas un sobre pequeno pechado que levará escrito no seu exterior: o pseudónimo do autor e o título da obra. No seu interior incluírase a seguinte documentación:

Nome completo de quen participa, enderezo postal, teléfono, enderezo electrónico (opcional) e fotocopia do DNI, tarxeta de residencia, ou outro documento de identidade.

As copias dixitais das fotografías entregaranse en formato cd-rom. Só é necesario 1 cd-rom por participante, cada arquivo dixital será nomeado co título da fotografía, e o cd-rom se rotulará no exterior co pseudónimo do concursante.

As fotografías, os sobres pequenos, e os cd-rom de cada participante entregaranse todo xunto dentro dun sobre grande pechado, no que constará o texto IV Concurso fotográfico “Festas do Cristo 2010”, e o pseudónimo do autor.

5 LUGAR E PRAZO DE ENTREGA :

As fotografías entregaranse nas oficinas do Centro Cultural Municipal en horario de 9:00 a 21:00 h. de luns a venres ata o prazo máximo do 15 de outubro.

6 XURADO E FALLO:

O xurado estará formado por varias persoas do ámbito da Fotografía e das Artes Plásticas, ademais dunha persoa en representación do Concello do Porriño que exercerá de secretario/a sen voto. O fallo do xurado comunicarase ás persoas gañadoras por teléfono ou correo electrónico, e darase a coñecer nos medios de comunicación.

7 PREMIOS:

Concederanse os seguintes premios:

- Un 1º PREMIO de trescentos euros (300 €),

- un 2º PREMIO de douscentos euros (200 €),

- e un 3º PREMIO de cen euros (100 €).

O importe dos premios estará suxeito á retención recollida na normativa fiscal vixente. O xurado resérvase o dereito de declarar deserto algún dos premios ou os tres por falla de calidade nos traballos, así como conceder mencións especiais, que non terán retribución económica.

8 EXPOSICIÓN:

Realizarase unha exposición coas fotografías presentadas a concurso no Centro Cultural Municipal en datas por determinar nos meses de outubro e novembro de 2010. Ademais publicarase unha exposición virtual na páxina web www.concellodoporrino.net

9 DEREITOS DE IMAXE:

O Concello do Porriño non se responsabiliza da posible violación dos dereitos de imaxe e de intimidade das persoas que aparezan nas fotografías. Será responsabilidade dos autores e autoras pedir a oportuna autorización no momento da toma.

10 DEREITOS PATRIMONIAIS DE EXPLOTACIÓN DAS FOTOGRAFÍAS PREMIADAS:

De conformidade co previsto na Lei de Propiedade Intelectual, a AUTORA ou AUTOR das fotografías premiadas, sen perxuízo dos dereitos morais que lle corresponden, cede ao Concello do Porriño co carácter de exclusiva e coa facultade de cesión a terceiras persoas, os dereitos patrimoniais de explotación das fotografías gañadoras.

11 OBRAS NON PREMIADAS

Do mesmo xeito todas as fotografías que se presenten a este concurso pasarán a formar parte dos fondos do Arquivo Municipal da Imaxe, pudendo ser incluídas na súa base de datos coa finalidade de consulta. Para calquera outro uso que non sexa ningún dos aquí especificados consultarase coas autoras e autores. A organización comprométese a respetar os dereitos morais derivados da autoría.

As obras non premiadas poderán ser devoltas a petición das persoas participantes, sempre pola súa conta, logo de pasados dous meses do fallo do xurado e ata o 31 de xaneiro de 2011. No caso de solicitar a devolución por axencia de transporte, devolveranse a portes debidos.

12 ACEPTACIÓN DAS BASES:

A participación neste concurso supón a total aceptación destas bases. O xurado queda facultado para dirimir calquera eventualidade non prevista nelas.

Máis información na web www.concellodoporrino.net

Porriño, agosto de 2010.

O Arquivo da Imaxe lanza unha nova monografía dixital sobre A Educación no Porriño

2010-07-20T15:06:00.007+02:00

A publicación conta con textos do historiador José Ramón Iglesias Veiga e con fotografías dos fondos do Arquivo da Imaxe

A Educación no Porriño: Dos inicios do século XX á creación das concentracións escolares é o título da nova monografía dixital que o Arquivo Municipal da Imaxe do Concello do Porriño ven de publicar na súa páxina web. O traballo consta de dúas partes. A primeira correspóndese cunha serie de textos elaborados polo historiador José Ramón Iglesias Veiga sobre as etapas máis importantes da historia do ensino no noso concello. O autor comeza describindo a penosa situación das escolas do Porriño a comezos do século XX, para continuar narrando episodios tan significativos como o das continuas aportacións da emigración porriñesa á mellora do sistema educativo, co seu máximo expoñente na creación da escola “Fernández Areal”; a creación das escolas Graduadas e dos grupos escolares das parroquias; a renovación pedagóxica da república con experiencias tan innovadoras como a posta en marcha da Cooperativa Rural Anexa a Escola Nacional de Nenos de Budiño (CREANN); as dificultades e o estancamento na etapa do franquismo; a aposta pola ilusión coa creación do Instituto; ou, por último, a desaparición do vello sistema das unitarias coa implantación da EXB en 1970 e a creación da primeira concentración escolar en Torneiros no ano 1971. Iglesias Veiga aporta ademais, un listado do maxisterio do Porriño entre o ano 1900 e o 1960, e outro de profesores e profesoras que traballaron no Instituto nos seus primeiros anos de existencia, onde atopamos datos tan curiosos como a presencia de Gonzalo Torrente Ballester como docente do Instituto do Porriño no ano 1970.

A segunda parte compóñena unha selección de máis de 150 imaxes históricas de temática escolar pertencentes aos fondos do Arquivo Municipal da Imaxe, algunhas delas cedidas por centros educativos como o I.E.S. “Pino Manso”, o C.E.I.P. “Antonio Palacios” ou o desaparecido Colexio "Casales". Na selección teñen cabida imaxes de distintos centros educativos, retratos de grupos escolares da práctica totalidade das escolas da vila e das parroquias, retratos escolares individuais, imaxes do Instituto nos seus primeiros anos de vida e retratos de mestras e mestres emblemáticos que exerceron no noso municipio. As imaxes sitúanse no mesmo contexto que abrangue o texto, así as máis antigas correspóndense coa primeira década do século XX e as máis recentes pertencen aos anos 70, a excepción dunha fotografía dunha das últimas promocións da Graduada que é do ano 1987.

Esta publicación reúne e actualiza parte dos contidos que xa puidemos ver na mostra “A Boa Educación” organizada polo Arquivo Municipal da Imaxe no ano 2008, presentando máis de trinta novas fotografías, que foron incorporándose ao fondo desde esa data.

Podedes consultar ou descaragar esta monografía na área de PRESENTACIÓN, sección PUBLICACIÓNS, da nosa páxina web:

http://www.arquivodaimaxedoporrino.net/

Nova publicación dixital de X. R. Paz Antón: A Coral Polifónica do Porriño e o compositor Antonio Paz Valverde

2010-07-06T11:43:00.005+02:00

A nova sección da páxina web do Arquivo Municipal da Imaxe "Publicacións Dixitais", pon a disposicións dos usuarios un novo traballo monográfico. Nesta ocasión foi o investigador Xosé Ramón Paz Antón quen se encargou de elaborar o texto "A Coral Polifónica do Porriño e o compositor Antonio Paz Valverde" con motivo do 50 aniversario da fundación do coro. Paz Antón convídanos a coñecer a historia deste colectivo nun orixinal percorrido a través do seu repertorio. A Coral supuso todo un fenómeno social no Porriño dos anos 60 e 70, e unha das experiencias musicais colectivas máis transcendentes da nosa historia recente, sendo os primeiros en grabar discos en toda a contorna. Afonda tamén Paz Antón na figura do seu director, o músico, compositor e arranxista Antonio Paz Valverde, e na repercusión que tivo e segue a ter a súa obra dentro e fora do ámbito coral e dentro e fora de Galicia. O traballo complétase cun extenso catálogo da obra que se coñece do autor e cunha análise do repertorio ao longo dos case 40 anos de existencia ininterrompida deste coro.

Este traballo serviu como base para a conferencia pronunciada nas "VI Xornadas de Historia do Porriño" no pasado decembro de 2009, e para os textos da exposición "Historia da Coral Polifónica do CRC", organizada polo Arquivo Municipal da Imaxe e que se puido contemplar no salón de actos do CRC cara a finais do pasado ano. O carácter didáctico da mostra non permitía reproducir a totalidade do texto. Agora, a través das "publicacións dixitais", temos a oportunidade de coñecer este minucioso e exhaustivo traballo de investigación na súa integridade.

O texto vai acompañado de imaxes históricas da vida do colectivo, así como de partituras, programas de man, correspondencia, documentos hemerográficos, etc. Todos estes documentos (na publicación só se reproduce unha moi pequena parte) foron cedidos por moitos dos compoñentes que pasaron polo coro e polo propio director ao Arquivo Municipal da Imaxe, para salvagardar así esta parte importante do noso patrimonio local.

O Arquivo abre a sección Publicacións Dixitais cunha monografía de Iglesias Veiga sobre as orixes das canteiras do Porriño

2010-06-21T13:56:00.011+02:00

A páxina web do Arquivo Municipal da Imaxe pon a disposición dos usuarios a nova sección "Publicacións Dixitais". Nesta sección, publicaranse distintos traballos e monografías promovidos polo Arquivo Municipal da Imaxe e relacionadas coa historia do Porriño. As publicacións contarán con documentación en imaxe procedente dos fondos do Arquivo.

Inauguramos esta sección coa monografía "As canteiras do Porriño nas primeiras décadas do século XX" do historiador José Ramón Iglesias Veiga, un dos mellores coñecedores da historia da nosa contorna e un colaborador infatigable do Arquivo Municipal da Imaxe. Esta publicación recolle e amplía artigos e comentarios aparecidos noutras publicacións de Iglesias Veiga sobre este tema, ofrecéndonos un texto completo e con multitude de referencias documentais sobre o que foi o nacemento dun dos sectores industriais máis importantes para o Porriño e os seus arredores.

Podedes descargar ou consultar este traballo na nosa páxina web, na área PRESENTACIÓN, sección PUBLICACIÓNS:

http://www.arquivodaimaxedoporrino.net/

José González Araujo publica un libro sobre o granito de Galicia

2010-06-21T12:33:00.004+02:00

O pasado 15 de xuño foi presentado no Centro Cultural Municipal o libro "O granito de Galicia e a súa historia". O autor, José González Araujo, director da Asociación de Canteras de Porriño desde 1996 ata 2007, estivo acompañado na presentación do seu libro polo xornalista e responsable do prólogo da obra Gerardo González Martín, o historiador José Ramón Iglesias Veiga e o Alcalde do Porriño Nelson Santos Argibay.

O traballo fai un percorrido pola historia do sector e polos protagonistas da súa evolución, destacando a importancia do Porriño como punto de partida e lugar de referencia dun dos sectores máis relevantes do entramado industrial galego. O traballo de Araujo é o froito de máis dun ano de investigación, recompilando e consultando documentos, artigos de investigación e fotografías sobre o tema. Se a isto lle sumamos a experiencia do autor, que traballou máis de 45 anos nunha das empresas impulsoras do granito galego, o resultado é este fermoso traballo, abordado sempre desde o rigor e o cariño de quen leva toda unha vida adicada ao mundo da pedra.

O libro conta con varias fotografías pertencentes aos fondos do Arquivo Municipal da Imaxe.

O IES "PINO MANSO" publica un traballo sobre os nomes das rúas do Porriño na web do Arquivo

2010-06-21T11:36:00.005+02:00

A área de PARTICPA da páxina web do Arquivo da Imaxe conta desde hoxe cun novo traballo publicado. Trátase do Proxecto Interdisciplinar "Os nomes das rúas do Porriño" elaborado por un grupo de tres profesores do IES "PINO MANSO" do Porriño. Os autores: Lourdes Manteiga Gorgal, Mª del Rosario Sorribas Chaves e José Ramón Iglesias Veiga, destacan o carácter didáctico do traballo "concibido como un pequeno monográfico preparado para achegar información sobre as rúas do Porriño a alumnos da ESO". Ademais da difusión deste traballo de investigación dentro do propio centro educativo, o artigo publícase por vez primeira na páxina web do Arquivo da Imaxe, coa intención dos autores de "poñelo ao servizo de calquera porriñés interesado nesta cuestión". O Arquivo Municipal da Imaxe do Concello do Porriño quere agradecer, unha vez máis, ao IES PINO MANSO a súa colaboración e o interese demostrado por este centro nos proxectos do Arquivo da Imaxe. Podedes consultar ou descargar este traballo no apartado de "Documentos enviados" na área de PARTICIPA da nosa páxina web:

http://www.arquivodaimaxedoporrino.net/

O Arquivo da Imaxe renova a súa páxina web

2010-03-31T10:22:00.001+02:00

A páxina permite visualizar unha parte importante dos fondos do Arquivo

O Arquivo Municipal da Imaxe do Concello do Porriño acaba de renovar o seu espazo web, http://www.arquivodaimaxedoporrino.net/, co desexo de que internet continúe sendo unha das canles a través das que achegar o Arquivo da Imaxe á sociedade de dentro e fóra do Porriño. Ademais da ampliación e actualización de contidos, a nova páxina presenta unha serie de cambios estruturais que proporcionan unha navegación máis sinxela e intuitiva para os internautas, a través dun deseño atractivo e funcional (3 Doc).

Por medio deste sitio web, os visitantes podedes coñecer toda a información relativa aos fondos e as actividades que desenvolve o Arquivo Municipal da Imaxe. Tamén podedes visualizar unha parte importante das fotografías e doutros documentos existentes nos fondos, a través de seccións como a de "Fotografías", con máis de 700 imaxes clasificadas en álbums temáticos; "Exposicións", con 4 mostras virtuais con máis de 200 fotografías de varias parroquias do municipio; ou "Outros documentos", con vídeos das recollidas orais realizadas polo Arquivo e coa descrición doutros fondos documentais presentes no Arquivo. A páxina conta tamén cun espazo reservado para tributo dos profesionais da fotografía, con notas biográficas e información relativa aos fotógrafos e fotógrafas que deixaron unha maior pegada no Porriño e na contorna. Po último, a través da sección "Participa", o Arquivo da Imaxe convida aos internautas a participar a través do envío tanto de fotografías, como doutras fontes documentais relacionadas co Porriño. Como novidade nesta sección, preséntase a creación dun espazo onde investigadores e estudosos da historia do Porriño e da Fotografía poden enviar e publicar os seus artigos e traballos de investigación, espazo no que, polo de agora, xa levan participado estudosos da historia local como David Pérez Rego, Diego Giráldez ou José Ramón Iglesias Veiga.

Recollida de fotografías da Policía Local

2010-02-15T12:10:00.005+01:00

FOTO MAGNO

FOTO RAMIRO

O Arquivo Municipal da Imaxe está colaborando coa Policía Local do Porriño nunha recollida de fotografías e documentación sobre a historia deste colectivo, que conta xa con máis de 95 anos de antigüedade no noso municipio. Na recollida están participando axentes da Policía Local actual, gardas municipais xubilados e familiares dos gardas falecidos. Ao mesmo tempo a Policía Local fai un chamamento a todos os familiares de antigos gardas municipais a que se poñan en contacto con eles para intentar elaborar un censo con todas as persoas que pertenceron a este corpo de seguridade municipal. As labouras de investigación non son doadas pola pouca documentación que se salvou do incendio do Arquivo Municipal no ano 1976, así que toda a documentación que poidan aportar os familiares de policías será moi útil para os traballos de investigación. Co material recollido estúdase levar a cabo algún proxecto de difusión.

O Concello do Porriño recibe unha doazón con parte da obra do músico e compositor porriñés Bernardo Giráldez del Campo

2010-01-21T17:34:00.004+01:00

Bernardo Giráldez Saborido, fillo do coñecido compositor porriñés Bernardo Giráldez del Campo, acaba de efectuar unha doazón ao Concello do Porriño con parte da obra musical do seu proxenitor. O alcalde do Porriño, Raúl Francés, e o cedente Bernardo Giráldez, asinaron o pasado martes 19 de xaneiro o convenio que formaliza este traspaso. O conxunto documental engloba partituras manuscritas de 14 obras musicais, partituras editadas de 4 obras, fotografías de diversas formacións das que foi compoñente, e outros documentos relacionados coa súa actividade profesional. Por vontade do cedente, este legado pasará a formar parte dos fondos do Arquivo Municipal da Imaxe, que se fará cargo da súa custodia, dixitalización, descrición e difusión.

Raúl Francés destacou o interese público colectivo que ten este conxunto documental para O Porriño por tratarse dun fondo de gran valor patrimonial no eido da cultura e da música do noso Concello. Pola súa parte, Giráldez Saborido manifestou ver cumprido o seu desexo de que este fondo fora conservado no Porriño, o pobo do seu pai; un desexo que cree que el tamen compartiría.

Bernardo Giráldez del Campo naceu no Porriño no ano 1918. Pertence a unha saga de músicos emblemáticos na historia musical do noso concello, iniciada polo seu avó Marcelino Giráldez, director da Banda de Musica do Porriño entre 1894 e 1928, e continuada polos seus tíos e o seu pai Bernardo, saxofonista e percusionista en bandas de música e orquestras de jazz. Tivo unha dilatada carreira musical, sobresaíndo como virtuoso violinista. Formou parte da Sociedad Filarmónica de Vigo, da que chegou a ser o seu primeiro violín e , inclusive, concertista. Destacou tamén a súa actividade como compoñente de conxuntos de música lixeira e de jazz onde, ademais do violín, tocaba instrumentos como o saxofón ou o clarinete. Seguindo a influencia das grandes big band, formou en Vigo o célebre Cuarteto Veracruz, que gozou de moito éxito durante décadas. Nos anos 60 trasládase a Madrid onde exerce como profesor de orquestra na especialidade de violín. En Madrid forma parte de grandes bandas, realizando xiras internacionais a paises como Finlandia, Noruega, Alemaña, Irán ou os Estados Unidos. Nesta época chega a tocar con destacados músicos do momento como Pedro Iturralde ou Regolí, cos que gravou varios discos. Ademais da súa carreira como instrumentista, Bernardo ("Tito") Giráldez tamén dedicou parte do seu tempo á composición musical, chegando a crear para a difusión das súas composicións Ediciones Celta. En 1971 regresa á súa vila natal, onde falece o 4 de setembro de 1974.

A mostra sobre a Coral aberta ata o 29 de xaneiro

2010-01-13T18:40:00.008+01:00

Todas as persoa que aínda non visitaron a mostra "Historia da Coral Polifónica do CRC" terán a oportunidade de facelo ata o día 29 de xaneiro. A exposición, organizada polo Concello do Porriño a través do Arquivo Municipal da Imaxe en colaboración co Círculo Recreativo Cultural, realiza un repaso aos 50 anos de historia da coral porriñesa e da figura do seu director, Antonio Paz Valverde, a través de varios paneis con textos, fotografías, partituras e documentos hemerográficos. A mostra compleméntase cunha peza audiovisual na que interveñes algunhas persoas vencelladas a historia desta agrupación, e con obxectos e vestimenta pertencente ás distintas etapas de vida da Coral.

Pódese visitar no salón de actos do Círculo Recreativo Cultural.

Inaugurouse a exposición "Historia da Coral Polifónica do CRC"

2009-11-30T09:57:00.015+01:00

Numeroso público asistiu o pasado venres 27 de novembro á inauguración da mostra retrospectiva sobre a Coral. No acto interviron a presidenta do C.R.C., Mª José Giráldez; o investigador, X. R. Paz Antón; o Alcalde en funcións, Pedro Pereira; e o que foi e segue a ser director da Coral desde a súa fundación, Antonio I. Paz Valverde, que agradeceu emocionado a celebración destes actos conmemorativos. A exposición permanecerá no salón de actos do Círculo recreativo Cultural até o 29 de decembro de 2009. Deixámosvos no blog algunhas fotos tomadas o día da inauguración.

O Arquivo da Imaxe prepara unha nova exposición con motivo do 50 Aniversario da Coral

2009-11-13T11:18:00.018+01:00

FOTO: Coral Polifónica do CRC cara 1969. Autor s/i (Foto Pako?

A CORAL. 50 ANIVERSARIO DA SÚA FUNDACIÓN
Baixo este título, o Concello do Porriño en colaboración co Círculo Recreativo Cultural traballan na programación dunha serie de actos conmemorativos co fin de lembrar e recoñecer o labor da Coral Polifónica do CRC e do seu director, o músico e compositor Antonio I. Paz Valverde; unha das figuras máis relevantes na traxectoria histórico-musical do noso concello, e unha personaxe clave na historia do canto coral en Galicia.

O Arquivo da Imaxe tamén se suma a esta celebración coa preparación dunha mostra retrospectiva titulada A Historia da Coral Polifónica do CRC, que se inaugurará o veindeiro 27 de novembro ás 20:00 h., e que permanecerá até o 29 de decembro no salón de actos do Círculo Recreativo Cultural.

A exposición estará composta por unha serie de paneis onde se narran os momentos máis significativos da historia da agrupación coral do Porriño a través de textos, imaxes fotográficas, documentación hemerográfica, programas de actuacións, correspondencia, partituras e uotro tipo de documentos. A mostra complementarase coa presencia de obxectos e documentos orixinais, e proxectarase un audiovisual con imaxes históricas da Coral.

Os textos da exposición foron elaborados por Xosé Ramón Paz Antón, coñecido estudoso da traxectoria musical do noso municipio, que ven de publicar o libro Bandas, Músicos e Orquestras do Porriño. As imaxes e demais documentación son froito da recollida levada a cabo polo Arquivo da Imaxe, na que participaron moitas persoas vencelladas á polifónica aportando fotos e outros documentos que conservaban nas súas casas.

Ademais da exposición, o Arquivo levou a cabo nos últimos meses un traballo de dixitalización e catalogación da obra do compositor A. Paz Valverde, a partir das partituras que o propio autor proporcionou ao AMI. Un traballo que podería ser editado nun futuro próximo co fin de dar unha maior difusión á obra (tan demandada) do compositor porriñés.

A. Paz Valverde visto polo pintor porriñés Antonio F. Valverde
para a revista Acougo

Xa temos gañadores!!

2009-10-29T13:01:00.010+01:00

Onte tivo lugar a inauguración da exposición das fotografías presentadas ao concurso fotográfico "As Festas do Cristo 2009", organizado polo Arquivo Municipal da Imaxe e a Oficina de Información Xuvenil do Concello do Porriño. No acto, a concelleira de Mocidade Miriam Martínez Troncoso, deu a coñecer o nome dos gañadores e das fotografías premiadas que son as seguintes:

O PRIMEIRO PREMIO, dotado con 400 €, foi para a fotografía titulada "Ti" de Patricia Rodríguez Botana:

O SEGUNDO PREMIO, dotado con 200 €, foi para otraballo titulado "Lume" de Francisco Bermejo Lazare:

O TERCEIRO PREMIO, dotado con 100 €, foi para a foto titulada "Festa" de Ernesto Herrero Rodríguez:

NORABOA AOS TRES!!!

A exposición cos traballos presentados permanecerá no Centro Cultural Municipal ata o 19 de novembro. Tamén podedes ver as fotos na exposición virtual que está colgada na páxina web do Arquivo Municipal da Imaxe, accedendo a través do vínculo que aparece neste blog á dereita.

Moitísimas grazas a todas e todos os que participástedes!

Vémonos o ano que ven!

Fotos tomadas onte, durante o acto de inauguración.

Xa podedes ver as fotos presentadas ao concurso "As Festas do Cristo 2009"

2009-10-21T17:19:00.009+02:00

O pasado día 16 de outubro rematou o prazo para presentar as fotografías aspirantes a gañar os tres premios que este ano se reparten na III edición do Concurso fotográfico "As Festas do Cristo". Nesta edición presentáronse 14 persoas con un total de 41 traballos. Se queredes ir vendo as fotos que optan aos premios, xa temos unha galería preparada na nosa páxina web. Podedes acceder directamente premendo no link que aparece na parte dereita deste blog.

A exposición "física" inaugurarase o mércores 28 de outubro ás 20:00 h. na sala de exposicións do Centro Cultural Municipal do Porriño. O día da inauguración procederase tamén á extrega de premios. Estades convidados!

Moita sorte a todas e todos os participantes!!!!

Últimos días para realizar fotos sobre as Festas do Cristo

2009-10-02T10:10:00.010+02:00

Ás persoas que queiran aspirar a gañar algún dos tres premios que que se ofrecen na terceira edición do concurso fotográfico "As Festas do Cristo" aínda teñen uns días para realizaras súas últimas fotografías. O Arquivo Municipal da Imaxe e a Oficina de Información Xuvenil (OMIX) do Concello do Porriño, organizadores deste evento, queren lembrarlles aos posibles participantes que os actos festivos rematan este domingo día 4 de outubro. Mentres tanto, quedan moitas actividades que fotografar dentro da programación festiva: animación de rúa, teatro, concertos, orquestras, o Torneo de Pincha, a Festa dos Callos ou a Festa da Bicicleta. Ademais, agárdase unha fin de semana con moito ambiente festivo, como xa ocorreu a fin de semna pasada na que as rúas estiveron ateigadas de xente, o que sempre propicia que se poidan obter unhas boas fotos. As tres mellores instantáneas serán premiadas con 400, 200 e 100 €. O prazo de presentación finaliza o vindeiro 16 de outubro.

Animádevos a participar!
Hai moitas fotos na rúa agardando a que as fagades ...

Para máis información consultade as bases nunha entrada anterior neste blog, ou na nosa páxina web na sección "novas" no apartado "Arquivo":

www.arquivodaimaxedoporrino.net

Moita sorte a todas e todos!!

Estas son algunhas das imaxes presentadas na edición 2008:

Foto: Patricia Rodríaguez Botana

Foto: Alfonso Troitiño Rozados

Foto: Susana Pérez Feijóo

Foto: Mónica García Rodríguez

O alcalde, Raúl Francés, inaugurou onte a exposición "Carracido en Fotos"

2009-09-16T14:06:00.016+02:00

Numeroso publico asistiu onte á inauguración da exposición "Carracido en Fotos". O acto de inauguración contou coa presencia de gran parte da veciñanza do barrio así como de persoas doutros lugares que se achegaron até Carracido para visitar a exposición. O alcalde do Porriño, Raúl Francés, encargado de inaugurar a mostra, tivo unhas palabras de agradecemento "para todas as persoas que fixeron posible esta exposición mediante a aportación de fotografías dos seus álbumes familiares", así como para os representantes da Asociación Veciñal e Cultural "As Mimosas" de Carracido: "por manter vivos os espazos comunitarios e polo seu apoio, traballo e colaboración en actividades e proxectos como o que hoxe inauguramos". Ademais, Francés, animou aos veciños e veciñas que non aportaron fotografías ou que o fixeron fora do prazo establecido para que puidesen pasar a formar parte da exposición (houbo varias persoas que trouxeron fotos o mesmo día da inauguración), a que continúen achegando imaxes ao Arquivo da Imaxe, pois para Francés "a exposición en Carracido non é máis que un punto de partida, pois grazas á participación de toda a veciñanza do municipio, o Arquivo da Imaxe xa conta con preto de 5.000 rexistros fotográficos susceptibles de formar parte doutros moitos proxectos expositivos, editoriais, ...etc." Raúl Francés salientou tamén a figura dos fotógrafos e fotógrafas que traballaron no nosos municipio, deixándonos un legado en imaxes de gran valor cultural, social, etnográfico e artístico.

Pola súa parte, a presidenta da Asociación Veciñal e Cultural "As Mimosas" de Carracido, Mª Carmen González, tamén agradeceu a todas as veciñas e veciños a exemplar participación do barrio na recollida, e agradeceu ao Concello e ao Arquivo da Imaxe a oportunidade brindada para poder levar a cabo unha iniciativa que rescata parte da memoria visual de Carracido.

Exposición "Carracido en Fotos"

2009-09-10T13:04:00.014+02:00

Os veciños e veciñas de Carracido, e todas as persoas que se acheguen a visitar esta mostra, terán a oportunidade de contemplar nunha exposición fotográfica, imaxes da vida cotiá do barrio porriñés correspondentes ao século XX. A iniciativa parte tras a recollida de fotografías levada a cabo no lugar durante os meses de abril e maio polo Arquivo Municipal da Imaxe do Concello do Porriño xunto coa Asociación Cultural e Veciñal "As Mimosas" de Carracido. Na recollida participaron máis de 20 familias aportando un total de 264 imaxes, sen dúbida un éxito tendo en conta que se trata dun barrio pequeno da vila. Esta recollida ven a continuar o programa de recuperación do patrimonio fotográfico levado a cabo polo Arquivo da Imaxe nas oito parroquias do municipio. Na exposición poderá verse unha escolma de 128 imaxes entre as que destacan temas como o retrato, a agricultura, a emigración, as festas, os deportes, a educación, ...etc . A mostra inaugurarase o martes 15 de setembro ás 20 h. e permanecerá no Local Veciñal de Carracido até o 15 de outubro, en horario de venres e sábados das 18:00 até as 20:00 h..

Desde o Arquivo da Imaxe queremos lembrarvos a todos os veciños e veciñas do municipio que podedes seguir colaborando a través do préstamo de fotografía para contribuír a seguir incrementando o fondo documental do Arquivo, que xa conta na actualidade con preto de 5.000 fotografías e outro tipo de documentos gráficos.

Fotos: Cartel: Equipo de futbol Imperial de Carracido. 1940-1945 (?). FOTO RAMIRO. Esquerda: Nenos bailando nunha voda. 1952. FOTO COMPANY. Dereita: Grupo de alumnas e alumnos da escola unitaria mixta de Carracido coa mestra Paquita Tomé. 1948-1949. FOTO E. UTRILLA

III Concurso Fotográfico "As Festas do Cristo 2009"

2009-08-18T12:06:00.012+02:00

Dentro das actividades que se inclúen na programación das Festas do Cristo do Porriño 2009 a Concellaría de Mocidade a través da Oficina de Información Xuvenil (O.M.I.X.), xunto co Arquivo Municipal da Imaxe do Concello do Porriño convocan a 3ª edición do concurso fotográfico “As festas do Cristo”.

BASES:

1. PARTICIPANTES:
Poderán participar todas as persoas que o desexen de calquera nacionalidade con residencia no estado español.

2. FOTOGRAFÍAS:
As fotografías presentaranse en papel fotográfico, cun tamaño de 18-20 X 24-25 cm, e pegadas sobre unha cartulina negra que teña como referencia o tamaño DIN A-4.
Cada participante poderá presentar ata un máximo de cinco fotografías. As obras deberán ser orixinais, inéditas e non ter sido premiadas nin recoñecidas ou seleccionadas noutros certames.

3. TEMÁTICA:
As fotografías versarán sobre calquera aspecto relacionado coas Festas do Cristo 2009 e como son vividas polas porriñesas e os porriñeses.

4. FORMA DE PRESENTACIÓN:
Cada fotografía levará escrito no seu dorso:
Pseudónimo, que deberá ser común para todas as obras da mesma autoría
Título, de cada unha das fotografías.
Acompañará a cada unha das fotografías presentadas un sobre pechado que levará escrito no seu exterior: III Concurso fotográfico “Festas do Cristo 2009”, o mesmo pseudónimo que nas obras presentadas e o título da obra.
No seu interior incluírase a seguinte documentación:
Título da obra presentada, nome completo de quen participa, enderezo postal, teléfono, enderezo electrónico (opcional) e fotocopia do DNI ou tarxeta de residencia.

Cada participante entregará un arquivo por fotografía en formato dixital (Tiff o Jpeg), a 300 ppp como mínimo e resolución mínima de 800x600 pixel.

5. LUGAR E PRAZO DE ENTREGA :
As fotografías entregaranse nas oficinas do Centro Cultural Municipal en horario de 9:00 a 21:00 h. de luns a venres ata o prazo máximo do 16 de outubro.

6. XURADO E FALLO:
O xurado estará formado por varias persoas do ámbito da Fotografía e das Artes Plásticas, ademais dunha persoa en representación do Concello do Porriño que exercerá de secretario/a sen voto. O fallo do xurado comunicarse á persoa gañadora por teléfono ou correo electrónico, e darase a coñecer nos medios de comunicación.

7. PREMIOS:
Concederanse os seguintes premios:
Un 1º PREMIO de catrocentos euros (400 €),
un 2º PREMIO de douscentos euros (200 €),
e un 3º PREMIO de cen euros (100 €).

O xurado resérvase o dereito de declarar deserto algún dos premios ou os tres por falla de calidade nos traballos, así como conceder mencións especiais, que non terán retribución económica.

8. EXPOSICIÓN:
Realizarase unha exposición coas fotografías presentadas a concurso no Centro Cultural Municipal en datas por determinar nos meses de outubro e novembro de 2009. Ademais subirase unha exposición virtual á páxina web: www.arquivodaimaxedoporrino.net

9. DEREITOS PATRIMONIAIS DE EXPLOTACIÓN DA FOTOGRAFÍA PREMIADA:
De conformidade co previsto na Lei de Propiedade Intelectual, a AUTORA ou AUTOR da fotografía premiada, sen perxuízo dos dereitos morais que lle corresponden, cede ao Concello do Porriño co carácter de exclusiva e coa facultade de cesión a terceiras persoas, os dereitos patrimoniais de explotación da fotografía gañadora.

10. OBRAS NON PREMIADAS
A presentación dunha fotografía a este concurso conleva a autorización expresa da súa reprodución en calquera formato que se estime necesario para a divulgación do concurso, especialmente no referido á súa promoción, difusión, comunicación e exhibición, incluídos exposicións, catálogos e páxinas web.
Do mesmo xeito todas as fotografías que se presenten a este concurso pasarán a formar parte dos fondos do Arquivo Municipal da Imaxe, pudendo ser incluídas na súa base de datos coa finalidade de consulta. Para calquera outro uso que non sexa ningún dos aquí especificados consultarase coas autoras e autores. A organización comprométese a respetar os dereitos morais derivados da autoría.
As obras non premiadas poderán ser devoltas a petición das persoas participantes, sempre pola súa conta, logo de pasados dous meses do fallo do xurado e ata o 31 de xaneiro de 2010. No caso de solicitar a devolución por axencia de transporte, devolveranse a portes debidos.

11. ACEPTACIÓN DAS BASES:
A participación neste concurso supón a total aceptación destas bases. O xurado queda facultado para dirimir calquera eventualidade non prevista nelas.

O Porriño, agosto de 2009.

"Xeracións": Fotografía gañadora na II edición, de Francisco Bermejo Lazare.

Paz Antón presenta o seu libro Bandas, músicos e orquestras do Porriño, con fotografías do Arquivo da Imaxe

2009-08-17T11:58:00.019+02:00

Cuberta do libro Bandas, músicos e orquestras do Porriño

O pintor e músico porriñés Xosé Ramón Paz Antón ven de presentar o seu último libro Bandas, músicos e orquestras do Porriño, editado na colección Historias Gráficas da editorial A Nosa Terra, e que supón unha importante aportación a musicoloxía galega. O libro é o resultado do traballo de investigación que Paz Antón ven realizando desde hai varios anos sobre a traxectoria musical do noso municipio. Segundo as palabras de Paz Antón "os distintos directores e músicos van desfilando polas páxinas desta publicación amosando ao mesmo tempo unha panorámica da historia local vencellada aos aspectos sociais e festivos da comunidade".

A publicación conta ademais coa colaboración do Arquivo Municipal da Imaxe a través da cesión de máis de 70 fotografías pertencentes aos nosos fondos.

Desde o Arquivo da Imaxe queremos agradecer ao autor a súa contribución á recuperación da memoria histórica do Porriño como xa fixo co seu anterior traballo O Porriño. 1936., e felicitalo por esta nova publicación.

Os transportes do Porriño no espello do tempo

2009-06-16T16:56:00.013+02:00

Desde o luns 15 de xuño pódese visitar no Centro Cultural Municipal a exposición Os transportes do Porriño no espello do tempo, realizada polo IES Pino Manso co apoio do Concello do Porriño. A mostra está composta por trinta paneis onde se narran os momentos máis significativos da historia dos medios de transporte e as vías de comunicación no noso municipio: as orixes da vila como un cruce de camiños até a conformación urbana actual; as melloras nas vías de comunicación e infraestruturas; a chegada do ferrocarril e o pulo que lle deu as industrias da zona; a importancia do tranvía como novo medio de transporte; o ómnibus e as liñas de pasaxeiros, os primeiros automóbiles e a nova industria que xerou o sector, ... etc. Os textos están acompañados por unha nutrida colección de imaxes históricas, gran parte delas pertencentes aos fondos do Arquivo Municipal da Imaxe.

Non perdades a ocasión de visitar esta interesante exposición!

A mostra permanecerá aberta até o xoves 2 de xullo en horario de luns a venres de 9:00 a 21:00 h.

Recollida de fotografías en Carracido

2009-04-06T09:40:00.011+02:00

FOTO: JOSÉ MOREIRA. Veciñas e veciños de Carracido. Primeiro cuarto do s. XX

O Arquivo da Imaxe xunto coa asociación veciñal e cultural "As Mimosas de Carracido" acabamos de iniciar unha recollida de fotografías antigas no barrio de Carracido. Quen queira participar neste proxecto poderá facelo prestando as súas fotografías ou películas de lugares, festas, emigración, sociedade, familia, traballo, acontecementos, vida cotiá, ... etc. O Arquivo da Imaxe reproducirá os orixinais que serán devoltos aos seus propietarios. As fotos recollidas pasarán a formar parte dos fondos do Arquivo e, ademais, realizarase proximamente unha exposición no Local Veciñal de Carracido. A recollida levarase a cabo durante todo o mes de abril. As persoas interesadas en participar poden contactar cos representantes da asociación "As Mimosas" ou traer as súas fotos directamente ao Arquivo Municipal da Imaxe, no Centro Cultural Municipal.

Con esta nova actividade queremos continuar o labor de recollida desenvolvido en todas as parroquias do Municipio, acadando así a representatividade de todo o territorio do Porriño nos fondos do Arquivo. Desde o Arquivo da Imaxe queremos lembrar, que ademais desta campaña organizada en Carracido, calquera persoa de calquera lugar do municipio pode colaborar co Arquivo cedendo as súas imaxes, formando así parte dun proxecto que se fai grazas á colaboración de toda a veciñanza do municipio.

"Historias do Pupitre" nas V Xornadas de historia do Porriño

2008-11-17T17:41:00.014+01:00

Hoxe comezan as Xornadas de Historia do Porriño que organiza cada ano a Biblioteca Pública Municipal. Nesta V edición a temática dos relatorios xirará en torno á educación, continuando un programa de actividades sobre o ensino no Porriño que deu com ezo no pasado mes de setembro coa exposición "A Boa Educación".

O Arquivo da Imaxe volverá a estar presente nestas xornadas, presentando un adianto do resultado do programa de recollida oral "Historias do pupitre", que levamos a cabo durante a exposición "A Boa Educación". Nestas gravacións participaron 22 persoas: mestras retiradas e antigos alumnos e alumnas que quixeron compartir connosco parte das súas vivencias da escola.

Moitas grazas a todas e a todos!!

O Concurso Fotográfico "As Festas do Cristo 2008" xa ten gañador.

2008-11-14T09:47:00.013+01:00

A fotografía Xeracións, de Francisco Bermejo Lazaré, foi a elixida como gañadora no II Concurso Fotográfico "As Festas do Cristo", organizado pola Concellería de Mocidade, a través da OMIX, e polo Arquivo Municipal da Imaxe.

O xurado, composto por Nacho Taibo Lorenzo (socio da empresa audiovisual Zoa Media), Begoña Rodríguez García (Licenciada en Belas Artes), Patricia Martínez Pereira (Técnica Superior en Fotografía Artística), e Mª de la Concepción Rodríguez Domínguez (Técnica Superior en Imaxe e Son) coincidiron en outorgar o único premio de 600 € á fotografía do porriñés Francisco Bermejo, entre os 72 traballos presentados.

A totalidade das fotografías poderánse ver no Centro Cultural até o 20 de novembro.

Desde aquí queremos transmitir os nosos parabéns ao gañador, así como o agradecemento a todas e todos os participantes.

Xeracións, de Francisco Bermejo Lazaré foi a fotografía premiada.

Comeza "A Boa Educación". A nova exposición do Arquivo da Imaxe

2008-09-24T20:19:00.013+02:00

Coincidindo co comezo do curso escolar, o Arquivo Minicipal da Imaxe presenta a mostra "A Boa Educación".

A través desta exposición poderedes facer un percorrido pola historia do ensino no Concello do Porriño. Ademais de exhibir máis de 100 fotografías históricas da maior parte das escolas do municipio, a mostra conta con diversos contidos de carácter histórico e etnográfico, como a recreación dunha pequena aula de mediados do s. XX, cedida polo Museo Pedagóxico de Galicia, na que podedes apreciar pezas de patrimonio moble e patrimonio lúdico, material bibliográfico e documental de distintas épocas, ou visualizar o vídeo "O ensino, unha viaxe no tempo". Coñeceredes tamén os momentos máis importantes da historia da educación no Porriño a través de 7 paneis con textos elaborados polo historiador José Ramón Iglesias Veiga; e teredes a oportunidade de lembrar ás mestras e aos mestres máis emblemáticos nun espazo adicado ao maxisterio e profesorado do Porriño.

Historias do pupitre.
Ademais, con motivo da exposición, o Arquivo da Imaxe pon en marcha o programa de recollida oral "Historias do Pupitre", onde os cidadáns que o desexen, poderán sentarse nun vello pupitre para relatar os seus recordos e vivencias da escola ante unha cámara. Con esta iniciativa quérese destacar a importancia das testemuñas orais como fonte de documentación para a recuperación do noso patrimonio intanxible. As recollidas serán os días 1 e 9 de outubro desde as 17:00 h. até as 19:00 h.

Horario:
A exposición, que abriu as súas portas o día 22 de setembro, permanecerá aberta até o 10 de outubro co seguinte horario:
De luns a venres, de 9:00 a 21:00 h.
Sábados, domingos e festivos; de 19:00 a 21:00 h.

Presentamos a web do Arquivo da Imaxe !

2008-09-10T13:57:00.012+02:00

O próximo venres 12 de setembro presentarase oficialmente a páxina web do Arquivo Municipal da Imaxe. O alcalde do Porriño, Raúl Francés, e a técnico do Arquivo darán a coñecer a representantes de diversos medios de comunicación os contidos e funcionalidade da páxina, nunha rolda de prensa que se celebrará no Centro Cultural Municipal ás 11:00h.

Desde a páxina web podes visualizar parte dos fondos do Arquivo; coñecer de primeira man as nosas actividades, proxectos e exposicións; ou realizar calquera tipo de consulta, solicitude ou aportación.

XA TEMOS PÁXINA WEB!
VISÍTANOS!

www.arquivodaimaxedoporrino.net

Convocado o II Concurso Fotográfico "As Festas do Cristo 2008"

2008-08-12T18:39:00.020+02:00

A Concellaría de Mocidade a través da Oficina Municipal de Información Xuvenil, e o Arquivo Municipal da Imaxe do Concello do Porriño convocamos o II Concurso fotográfico “As Festas do Cristo 2008”.

A temática das fotografías versará sobre as Festas do Crito deste ano e os organizadores pretendemos, un ano máis, que os concursantes sexades capaces de plasmar en imaxes o acontecemento festivo máis importante da vila do Louro.

Cada participante poderá presentar un máximo de cinco traballos en papel fotográfico dun tamaño entre 18-20 x 24-25 cm antes do 17 de outubro de 2008. Un xurado formado por varias persoas do ámbito da Fotografía e das Artes Plásticas será quen decida cal é a mellor imaxe. Haberá un único premio de 600 €. A continuación colgamos as bases polo miudo:

BASES DO II CONCURSO FOTOGRÁFICO “AS FESTAS DO CRISTO 2008”

Dentro das actividades que se inclúen na programación das Festas do Cristo do Porriño 2008 a Concellería Mocidade a través da Oficina de Información Xuvenil (O.M.I.X.), xunto co Arquivo Municipal da Imaxe do Concello do Porriño convocan a 2ª edición do Concurso fotográfico “As festas do Cristo”.

1 PARTICIPANTES:

Poderán participar todas as persoas que o desexen de calquera nacionalidade con residencia en España.

2 FOTOGRAFÍAS:

As fotografías presentaranse en papel fotográfico, cun tamaño de 18-20 X 24-25 cm, e pegadas sobre unha cartulina que teña como referencia o tamaño DIN A-4.
Cada participante poderá presentar ata un máximo de cinco fotografías. As obras deberán ser orixinais, inéditas e non ter sido premiadas nin recoñecidas ou seleccionadas noutros certames. Mesmamente deberán estar libres de dereitos que poidan detentar terceiros.

3 TEMÁTICA:

As fotografías versarán sobre calquera aspecto relacionado coas Festas do Cristo 2008 e como son vividas polos porriñeses e porriñesas.

4 FORMA DE PRESENTACIÓN:

Cada fotografía levará escrito no seu dorso:
Pseudónimo, que deberá ser común para todas as obras do mesmo autor/a
Título, de cada unha das fotografías.
Acompañará a cada unha das fotografías presentadas un sobre pechado que levará escrito no seu exterior: II Concurso fotográfico “Festas do Cristo 2008”, o mesmo pseudónimo que nas obras presentadas e o título da obra.
No seu interior incluírase a seguinte documentación:
Título da obra presentada, nome completo do/a participante, domicilio, teléfono, enderezo electrónico (opcional) e fotocopia do DNI ou tarxeta de residencia.

5 LUGAR E PRAZO DE ENTREGA :

As fotografías entregaranse nas oficinas do Centro Cultural Municipal en horario de 9:00 a 21:00 h. de luns a venres ata o prazo máximo do 17 de outubro ás 21:00 h.

6 XURADO E FALLO:

O xurado estará formado por varias persoas do ámbito da Fotografía e das Artes Plásticas, ademais dun membro/a en representación do Concello do Porriño que exercerá de secretario/a sen voto. O fallo do xurado comunicarse persoalmente ao gañador/a por teléfono ou correo electrónico, e darase a coñecer nos medios de comunicación.

7 PREMIO:

Concederase un único premio de seiscentos euros (600 €). O xurado resérvase o dereito de declarar o premio deserto por falla de calidade nos traballos, así como conceder mencións especiais, que non terán retribución económica.

8 EXPOSICIÓN:

Realizarase unha exposición coas fotografías presentadas a concurso no Centro Cultural Municipal en datas por determinar no mes de novembro de 2008.

9 DEREITOS PATRIMONIAIS DE EXPLOTACIÓN DA FOTOGRAFÍA PREMIADA:

De conformidade co previsto na Lei de Propiedade Intelectual, o AUTOR/A da fotografía premiada, sen perxuízo dos dereitos morais que lle corresponden, cede ao Concello do Porriño co carácter de exclusiva e coa facultade de cesión a terceiros, os dereitos patrimoniais de explotación da fotografía gañadora.

10 OBRAS NON PREMIADAS:

A presentación dunha fotografía a este concurso conleva a autorización expresa da súa reprodución en calquera formato que se estime necesario para a divulgación do concurso, especialmente no referido á súa promoción, difusión, comunicación e exhibición, incluídos exposicións, catálogos e páxinas web.
Do mesmo xeito todas as fotografías que se presenten a este concurso pasarán a formar parte dos fondos do Arquivo Municipal da Imaxe, pudendo ser incluídas na súa base de datos coa finalidade de consulta por parte de cidadáns en xeral. Para calquera outro uso que non sexa ningún dos aquí especificados consultarase cos autores/as. A organización comprométese a respetar os dereitos morais dos autores/as.
As obras non premiadas poderán ser devoltas a petición dos seus autores/as, sempre pola súa conta, logo de pasados dous meses do fallo do xurado e ata o 31 de xaneiro de 2008. No caso de solicitar a devolución por axencia de transporte, devolveranse a portes debidos.

11 ACEPTACIÓN DAS BASES:

A participación neste concurso supón a total aceptación destas bases. O xurado queda facultado para dirimir calquera eventualidade non prevista nelas.
O Porriño, agosto de 2008.
Fotografía gañadora na edición do 2007, obra de Patricia Rodríguez Botana.

Rescatando as vellas fotografías da escola

2008-07-08T14:05:00.029+02:00

Grupo de alumnos e alumnas da escola das irmás Margarita e Adela Lanzós. Autor descoñecido. Ca. 1925.

Desde o Arquivo Municipal da Imaxe estamos preparando unha mostra retrospectiva sobre a escola no Porriño. Na exposición, que se celebrará nos meses de setembro e outubro, coincidindo co inicio do calendario escolar, presentaranse diversos contidos e actividades relacionadas coa historia do ensino no noso concello. Ademais poderánse ver parte das imaxes que integran a sección de fotografía da educación pertencente ao fondo xeral do Arquivo da Imaxe que inclúe, entre outros, numerosos retratos escolares (tanto individuais como de grupo), imaxes de diferentes escenas da actividade educativa, fotografías de edificios que funcionaron ou funcionan como centros docentes no noso concello, ou retratos de mestres emblemáticos que xa forman parte da memoria e dos recordos da infancia de moitos porriñeses.

Participa coas túas fotos da escola

Para complementar esta sección, o Arquivo da Imaxe convida aos veciñose veciñas de todo o municipio a que participen do proxecto prestando as súas fotos da escola, e desta maneira poidan estar presentes tamén na exposición. Os orixinais fotográficos serán dixitalizados e devoltos aos seus propietarios. As fotografías recolleranse durante os meses de xuño e xullo nas oficinas do Arquivo Municipal da Imaxe no Centro Cultural Municipal, en horario de 9 da mañán ás 3 da tarde ou poñéndose en contacto no teléfono 986337624.

Benvida

2008-07-06T20:55:00.001+02:00

Benvidos ao blog do Arquivo Municipal da Imaxe.